D'Politiker

Ke Politiker wott,
dass me würklich weiss, wien er’s meint, 
drum seit er dis u meint das 
u seit, es dient em Volk, 
alli wärde dervo profitire. 
Und er seit’s e so, 
dass die meiste meine, 
er meini’s würklech e so. 
Nume e Minderheit versteit, 
dass er im Grund gnoh seit: 
Weisch, wien i meine?

Guet, zuegäh, es isch o chy übertribe, 
wenn ig säge, jede Politiker sig e so. 
Derby gitt’s ja o die andere, 
die si ganz ehrlich 
u säge immer wie sie’s meine, 
die säge, wie’s würklech isch, 
genau so, wien i meine, dass d’Wält sig, 
drum wählen i die, weisch wien i meine?

U die Gwählte säge geng meh, 
wie me meint, dass es sig, 
bis sie sälber gloube, 
d’Wält sig würklech e so, 
wie die meiste, wo sie gwählt hei, 
gloube, d’Wält sig e so. 
Weisch, wien i meine?

Bewiese, wie d’Wält isch, fingsch für beides, 
für Finde u Fründe,  
u jede cha ganz ehrlech säge, 
es sich e so! 
U de isch’s e so!
Weisch wien i meine?

Nume, wie chunnsch da wieder drus
we jede meint, so wien er gsäch, sigs rächt?
D’Wulche u der Räge zieht über alli Wält, 
D’Sunne schynt über alli glych. 
Es läbt jede Mönsch vo däm, wo d’Ärde häre gitt. 
Drum wähl du die, wo Wytsicht hei, 
wo an alli dänke, wo Brügge schlöh. 
Weisch, wien i meine?